अंबाजोगाई दि.११(प्रतिनिधी) : मोरेवाडी(Crime) शिवारात वराह चोरीच्या कुरापतीवरून सुरू झालेल्या वादातून झालेल्या तलवार आणि दगडफेकीत दोन्ही बाजूंनी गंभीर जखमी होण्याचा प्रकार घडला आहे. या घटनेत परस्परविरोधी तक्रारींवरून दोन्ही गटांतील एकूण ८ जणांवर अंबाजोगाई शहर (Police)पोलिस ठाण्यात प्राणघातक हल्ला केल्याचे गुन्हे दाखल करण्यात आले आहेत.

             दिनेश लक्ष्मण जाधव (रा. सदर बाजार, अंबाजोगाई) यांनी दिलेल्या तक्रारीत म्हटले आहे की, १० ऑगस्ट रोजी दुपारी अडीच वाजता ते व त्यांचे भाऊ भारत जाधव स्विफ्ट डिझायर गाडीतून भावाच्या जोगाईवाडी शिवारातील घरी जात होते. मोरेवाडीतील लाल सटवा मेंडके यांच्या घरासमोरून जात असताना गाडीच्या मागील काचेला जोरात आवाज आला. गाडी थांबविल्यावर लाला भागवत मेंडके, सुजीत उर्फ सुरज सटवा मेंडके, सटवा भागवत मेंडके आणि पवन मेंडके (सर्व रा. मोरेवाडी, अंबाजोगाई) यांनी घेराव घातला. भीतीपोटी तेथून निघून YCM कॉलेजसमोर गाडी थांबवल्यानंतर आरोपी पुन्हा दोन दुचाक्यांवर आले. त्यांनी ‘जनावरे चोरतोस का?’ असा सवाल करत तलवारीने भारत जाधव यांच्या डोक्यात वार केला. बचाव करताना दिनेश जाधव यांच्या तळहातावर गंभीर जखम झाली. त्यानंतर दगडफेक करून भावंडांसह युवराज मेंडके, हेमंत जिरंगे यांनाही मारहाण केल्याचा आरोप करण्यात आला आहे. सदर फिर्यादीवरून लाला मेंडके, सुजीत मेंडके, सटवा मेंडके आणि पवन मेंडके यांच्याविरुद्ध प्राणघातक हल्ल्याचा गुन्हा नोंदवण्यात आला.

दरम्यान, लाला भागवत मेंडके (रा. मोरेवाडी) यांनी दिलेल्या तक्रारीनुसार, त्याच दिवशी दुपारी अडीच वाजता भारत जाधव व त्यांचे सहकारी स्विफ्ट डिझायर गाडी थेट त्यांच्या घरासमोर आणून उभी केली. गाडी हटविण्याविषयी विचारणा केली असता ‘तुझे डुकरे आम्ही चोरून विकले, काही करु शकत नाहीस’ असे म्हणत शिवीगाळ केल्याचा दावा फिर्यादीने केला. त्यानंतर तो, त्याचा भाऊ सटवा व पुतण्या सुरज पोलिस स्टेशनकडे तक्रार करण्यासाठी निघाले असता, YCM कॉलेजजवळ भारत लक्ष्मण जाधव, दिनेश लक्ष्मण जाधव, युवराज बाबुराव गायकवाड व हेमंत धिरंगे (सर्व रा. सदर बाजार, अंबाजोगाई) हे तलवार व लोखंडी रॉड घेऊन आले. त्यांनी सटवा मेंडके यांच्या हातावर, दिनेश यांनी छातीवर, तर युवराज यांनी गळ्यावर तलवारीने वार करून जखमी केले. सुरज मेंडके यांच्यावरही तलवारीने हल्ला झाल्याचे तक्रारीत नमूद आहे. या तक्रारीच्या आधारे चारही आरोपींवर प्राणघातक हल्ल्याचा गुन्हा दाखल करण्यात आला. दरम्यान, या घटनेत दोन्ही बाजूंतील अनेक जण जखमी झाले असून, तलवार आणि दगडफेकीत गाडीचेही नुकसान झाले आहे. अंबाजोगाई शहर पोलीस पुढील तपास करत आहेत.