देशातील सर्वात व्यस्त विमानतळांपैकी एक असलेल्या मुंबईच्या छत्रपती शिवाजी महाराज आंतरराष्ट्रीय विमानतळावर (Chhatrapati Shivaji Maharaj International Airport) सर्व्हर डाऊन झाल्यामुळे मागील 20 मिनिटांपासून चेक इन करताना प्रवाशांना अनेक अडचणींचा सामना करावा लागतोय. नियोजित फ्लाईट्स बुकिंग केलं असताना विमानतळावर चेक इनसाठी गर्दी झालेली पाहायला मिळत आहे.

सर्व्हर डाऊन झाल्यामुळे हा प्रॉब्लेम झाल्याचं सांगण्यात येत आहे. ही तांत्रिक अडचण सोडविण्यासाठी विमानतळ प्रशासन पूर्णपणे काम करत असून लवकरच सेवा पूर्ववत करण्यात येईल, असं विमानतळ प्रशासनाकडून सांगण्यात आलं आहे. विमानतळाचे सर्व्हर पूर्णपणे डाऊन झाल्यामुळे प्रवासी डेटासंबंधी संपूर्ण काम ठप्प झाले आहे. प्रवाशांची तपासणी, बॅगेज काऊंटर, चेक इन, बोर्डिंग पास देणे सारे काही थांबलेले आहे.या संदर्भात मुंबई आंतरराष्ट्रीय विमानतळावरील सीआयएसएफ यांनी दिलेल्या माहितीनुसार, मुंबई आंतरराष्ट्रीय विमानतळावर सर्व्हर डाऊन असल्याने गर्दी सामान्यपेक्षा थोडी जास्त आहे. गर्दीचे व्यवस्थापन व्यवस्थित केले जात आहे आणि मॅन्युअल पास दिले जात असल्याने गोंधळ नाही असे म्हटले आहे. अनेक ट्विटर यूजर्सनी गर्दीचे फोटो शेअर केले आहेत. या संदर्भात एअर इंडियाने (Air India) ट्विट करत उत्तर दिले आहे की, "आम्ही समजतो की विलंब नक्कीच अस्वस्थ करणारा आहे. आमची टीम गैरसोय कमी करण्यासाठी परिश्रमपूर्वक काम करत आहे. पुढील अपडेटसाठी ते तुमच्या संपर्कात राहू."